لَفْگَدَةْ

شعيب صالح المدكورى

*****

sujets

لَفْگَدَةْ
...
تْفَگَّدتْ رَاسِي
بْدِيتْ نْقَلَّبْ
بِينْ رْيُوسْ
لْگِتُوا لْمَتْعُوسْ
عَتْرُوسْ مَفْقُوسْ
رَافَدْ هَمْ نْفُوسْ
ؤُ نَاسِي رَاسُو
...
تْفَگَّدتْ رَاسِي
بْدِيتْ نْخَمَّمْ
نَزْگَلْ ؤُتَمْتَمْ
بَاغِي نَفْهَمْ
سْبَابْ جْلَاهْ
خَدُو ؤُدَّاهْ
كِيفَاشْ هْمَلْتُو؟؟؟
...
تْفَگَّدتْ رَاسِي
حَسُّو نَاقَصْنِي
كْلَامُو هْجَرْنِي
غْيَابُو شْطَنِّي
بْدِيتْ نْحَيَّحْ
نْغَوَّتْ ؤنْصِيحْ
ؤُنْتَحَسَّسْ جْوَابُو
...
تْفَگَّدتْ رَاسِي
لْگِتُو مَشْغُولْ
بِغِيرُو مَهْبُولْ
خَلَّاهْ مَعْزُولْ
فِ حَوشْ حْجَرْ
مَانَعْ يَقْهَرْ
لِيلُو ؤُنْهَارُو
...
تْفَگَّدتْ رَاسِي
لْگِيتْ لْوَقتْ فَاتْ
شِيبْة بِرَّاسْ نَبْتَاتْ
ضَعفْ دْخَلْ دَّاتْ
صَحَّة رَحْلَاتْ
تْقَرْبَتْ لْخَطْوَاتْ
ؤُتْسَلَاتْ إِيَّامُو
...
تْفَگَّدتْ رَاسِي
جبرت فات لفوت
قَرْبَاتْ لْمُوتْ
لَكْلَامْ مَسْكُوتْ
مَ تَلْگَا خُوتْ
بَابْ بْلَا سَرْوتْ
حسابو ؤُعْدَامُو
...
فِيقْ يَا نَّاسِي
مَنْ غَفَلْتَكْ تْقَاسِي
تَصْبَحْ مَفْتُونْ
مْشَكَّلْ مَغْبُونْ
بِغِيرَكْ مَشْطُونْ
بِوْحَايلُو مَسْجُونْ
ؤُتَغْرَقْ فِ هْمُومُو
... شعيب صالح المدكوري
تامسنا 19.06.2018