خيمة شعيب صالح المدكوري

تَلْفَة

وَاحَدْ فِ لَغْرَامْ يَمْدَحْ

مَتْعَنِّى بِ هْوَا عَشَّاقُو

تَلْگَاهْ فَرْحَانْ مْشَرَّحْ

نَاشَطْ رَاضِي بِ حْوَالُو

فِ وَادْ زْهُو مَرْتَاحْ

مَ مْسَوَّقْ لْمَزلُوْط خْبَارُو

يَتْخَبَّطْ ؤُ جَارْيَا بِهْ رْيَاحْ

فِ بْحُرَاتْ هْمُومُو

لَكْفُوفْ كُلْهَا جْرَاحْ

مَ تَعْرَفْ شْكُونْ سْبَابُو

...

لِيَّامْ زِينَة مْشِاتْ ؤُ تَنْسَاتْ

صَبْحَتْ بِينْ نَّاسْ خْرَفَة

بِ جْهَلْ جْمَاعَة تَبْلَاتْ

مَ بْقَاتْ مْحَبَّة وَ لَا عَشْرَة
شْبَابْ فِ لْفحشْ رْعَاتْ

تْشَمْكِير وُ سْيُوفْ رْفَاگَة

لَبْنَاتْ  زَهْوَنِيَاتْ نَشْطَاتْ

لَا سَرْ لَا صْوَابْ طْبِيعَة

مَ بْقَاوْ يَصَلْحُو مْزَوْجَاتْ

وَلْفُو سِيبَة ؤُ لْيَالِي لْحَمْرَة

...

لِ گَالْ لّكْ لَا تْگُولْ لِيه

مَ بْقَى فِ دَنْيَا مَ يَتْشَافْ

لْمَعْقُولْ مَ بْقَاوْ مُولِيهْ

وَسْط لَكْذُوبْ تْلَفْ

لَحْرُوفْ تْوَدْرُو مْعَانِيهْ

عَنْد لِ عَقْلُو شْرَفْ

مَ بْقَا غِيرْ لِ تَكْوِيهْ

بِ كْلَامْ قْبِيحْ  يَزَعَّفْ

أَشْ بْقَا بَاشْ تَفْدِيهْ

غِيرْ خَلِّي لْهَمْ يَشْتَفْ

***

شعيب صالح المدكوري

الرباط 19.10.2017