خيمة شعيب صالح المدكوري

غْرَامْ الشِيبَانِي

تْصّيَّدْ أُو طَاحْ فِي الشَبْكَة

مَا لُو هُوَ أُو مَالْ لَغْرَامْ

حْتَى شْرَفْ عَادْ بْغَة

يَرَجَّعْ لِي فَاتْ مَنْ لَيَّامْ

اِعِيشْ فِي الْحُبْ أُو الْمُتْعَة

مَسْكِينْ حَاشَرْ رُوحُو فِي زْحَامْ

حْتَى نْسَي رَاسُو أُو الْقَبْلَة

عَادْ يَشْعَرْ أُو يَكَثَّرْ كْلَامْ

يَنْشَدْ أُو يُوصَفْ زِينَة لْفَتْنَة

مْوَضَرْ فِي هْوَاهْ هَازْ عْلَامْ

بَايَنْ الزُغْبِي تْلَفْ بِ مَرَّة

هَذِي هِيَ لِ جَابَتْ لِيهْ تْمَامْ

حْكَايتُو  تْكُونْ لِلنَّاسْ عِبْرَة

تَتْخَطَّطْ فِي قَامُوسْ لَحْلَامْ

يَا دَاكْ لِنْسَانْ جَدَّدْ النَظْرَة

شْوفْ حَالْتَكْ قْبَلْ مَا تْلَامْ

گْبَلْ يَتْصَابْ گَلْبَكْ بِضَرْبَة

طْلُبْ مَنْ الله حُسْن لْخِتَامْ

رَاكْ تَتْغَرْ اُو تْلَاحْ بِرَكْلَة

أُو شُوفْ أَشْ جَا يَسَكَّتْ لْفَامْ

عْدْيَانَكْ اِگُلُو لِيكْ بِالصَحَّة

الْحُبْ بَصَحْ زْوِينْ عَاَمرْ أَنْغَامْ

ضْوَا الْحَيَاتْ أِيزِيدْ شُعْلَة

بَصَحْ يِكُونْ فِي وَقْتُو بِ تْمَامْ

تَجْنِيهْ أُو هُوَ عَالِي فِي نَخْلَة

بْلَا مْشَاكَلْ وَلَا تَخْمَامْ

يِجِيبْ لْخِيرْحَامَلْ لْبَرَكَة

فِيقْ أَگْرِينِي مَنْ لَحْلََامْ

أُو قْطَعْ اَخُويَا هَبْرَة تَبْرَة

قْبَلْ مَا يَكْتَارْ عْلِيكْ تَزْمَامْ

تَصْبَحْ حَالْتَكْ فِي وَرْطَة

لِي فَاتُو ارْكَبْ مَا يَتْرَامْ

اِلَا غَامَرْ يَزْلَگْ فِي لْحَدْرَة

وَلِي دَاخَلْ لَبْحَرْ مَاشِي عَوَّامْ

رَاهْ يَغْرَقْ أُو يَغْبَرْ غَبْرَة

هَزْ عَيْنِيكْ لِ سْمَا شُوفْ لَغْمَامْ

لِ فَاتَتْ مَا بْقَاتْ لِيهَا رَجْعَة

أُو لْ عُمْرُ كْبَرْ يَمْشِي مْعَ لِيَامْ

عَنْدَاكْ تَحْسَبْ رَاسَكْ دْرَكْتِ هَمْزَة

تَصْبَحْ ضَحْكَة كْبِيرَة عَنْد قْوَامْ

شعيب صالح المدكوري

08.07.2017