خيمة شعيب صالح المدكوري

الْخَير وَ الشَّرْ

الْخِيرْ أُو الَّشْر...مْخَاصْمِينْ

قَدَّامْ لْقَاضِي...وَاقْفِينْ

عْلَى قْضِيتْهُمْ...مَتْرَافْعِينْ

نْطَقْ الْفَاضِي قَالْ

وَجَّهْ لِلْخِيرْ سُؤَالْ

أَشْ عَنْدَك ْبِ لْبَالْ

قْولْ مَا عَنْدَكْ

اَنَا سَامْعَكْ

سِيدِ الْقَاضِي طَبْعِي مَعْرُوفْ

نقَّلب لَقْلُوبْ وَ نْشُوفْ

نَزْرَعْ الْحُبْ الْمَخْطُوفْ

يِجِي بِ لْخَيرْ مَأْلُوفْ

وَ الْحُبْ لِلنَّاسْ مَكْشُوفْ

لَكِنْ هَادْ الْمْكُروهْ قَدَّامَكْ

جَا مَنْ وْرَايَة هَالَكْ

فِي قْلُوبْ النَّاسْ سَالَكْ

يَحْرَثْ الْكُرْه وَ لَخْصَامْ

يَرَّجَعْ الْوَاحَدْ نَمَّامْ

يَصْبَحْ كْلَامُو سَامْ

يَرْمِي بِ سَّمْ سْهَامْ

كُلْ مَا بْنِيتُو ضَاعْ

مَا بْقِيتْ نْقّدْ نَقَنَّعْ

لَقْلُوبْ تِشْفَعْ

بِالْحُبْ تَشْبَعْ

بِالنُّورْ تَلْمَعْ

هَادِي اَسِيدْ الْقَاضِي شْكَايْتِي

مْحَانْتِي مْعَاهْ و شْقَايْتِي

شُوفْ لِي حِيلَة لِبْلَايْتِي

بِسْبَابُو شَعْلَتْ حْرُوبْ

تْسَبَّبْ فِي ذْنُوبْ

لْمُنْكَرْ فِي دْرُوبْ

أُو كَثْرَةْ لَعْيُوبْ

سْمَعْنَا مْقَالَكْ اُو فْهَمْنَاهْ

نْسَمْعُو الشَّرْ لَبْلَاهْ

أَشْ عَنْدُو مَعْنَاهْ

أَنَا سِيدْ الْقَاضِي مَظْلُومْ

صْبَحْتْ عَنْد الْكُلْ مَتْهُومْ

بِالْكُرهْ وَ لَحْقَدْ مَشْتُومْ

بِ لَحْسَدْ وَ لْغِيَرةْ مَرْشُومْ

اَنَا مَخْلُوقْ لِيَ نَاسِي

شْحَالْ مَنْ مَظْلُومْ يِقَاسِي

كُلْ وَاحَدْ يِقُولْ رَاسِي

حْتَى طَارْ نْعَاسِي

وَاشْ وَحْدِي نَمْشِي لْنَارْ

نَرْفَدْ وَحْدِي الْعَارْ

نْكُونْ وَحْدِي مَكَّارْ

رَاهْ حَكْمَة رَبَّي وَ لَقْدَارْ

مَا لِي فِيهَا شْوَارْ

النَّاسْ بِعْقُولْهَمْ مَتْمَتْعِّينْ

يَسَمْعُو بِوْدانَهُمْ وُ الْعِينِينْ

لِكْلَامْ غِيرْهُمْ سَامْعِينْ

عَايْشِينْ نَاشْطْينْ فَارْحِينْ

الْمِيزَانْ اَسِيدْ الْقَاضِي كَفَّينْ

هَكْدَا خَلْقُوهْ الصَّانْعِينْ

سْمَعْنَا مْقَالَكْ اُو فْهَمْنَاهْ

كُلْ وَاحَدْ حَيَّرْنِي بِشْكَاهْ

بِيَنْتكُمْ عَقْلِي حَارْ تَاهْ

فْهُمْتْ كُلْ وَاحُدْ لْغَاهْ

 لِي دَا شِي دَاهْ

لِي قْصَدْ الْحُبْ رْوَاهْ

لٍي قْصَدْ الْكَرْه سْقَاهْ

كُلْ وَاَحْد أُو بْغَاهْ

كُلْ وَاحَدْ أُو هْوَاهْ

لِي سَلَّكْو رَبِي هْدَاهْ

مَنْ لَعْذَابْ نَجَّاهْ

تْرَفْعَتْ لْجَلْسَة تْسِدَّتْ لَفْوَاهْ

شعيب صالح المدكوري

10.07.2017