شْكُونْ؟؟؟

شعيب صالح المدكورى

*****

شْكُونْ؟؟؟
...
سْعَدتْ بِ رَبِّي لْخَالَقْنِي
عْنَايْتُو بِيَا مَ تْهًونْ
حَكَمْتُو بِينْ كَافْ ؤُنُونْ
لٍ بْغَهَا تْكُونْ تْكُونْ
مَنْ سْمَا طْعَمْنِي ؤُرْزَقْنِي
مَ خَلَّنِي مَرْهُونْ
وَلَا عَقْلِي مَجْنُونْ
بِ رْعَايْتُو مَحْصُونْ
الشَيْطَانْ بِ لْفَقْر وَعَدْنِي
بِ لَكْدُوبْ لْمَتْقُونْ
صْبَحْ بَالِي مَشْطُونْ
ؤُحْيَاتِي طَاعُونْ
كِيفْ نْصَدْ عْلَى لِ رْحَمْنِي
ؤُنَتْبَعْ لَعْدُو لْمَلْعُونْ
يَنْكُرْنِي ؤُيخُونْ
ؤُنْوَلِّي مَغْبُونْ
كْلَامْ لْمَعْقُولْ مَ هُوَ مْعَانِي
مَ هُوَ اَفْيُونْ
وَلَا زُورْ مَقُرُونْ
وَلَا سِرْ مَخْزُونْ
گَلتْ لِيكْ الْحَقْ لَا تْوَاخَدْنِي
ؤُانْتَ تَعْرَفْ شْكُونْ
لَكْلَامْ لْمَشْحُونْ
مَنْ لْمَضْمُونْ
...
شعيب صالح المدكوري
تامسنة 16.03.2018