خيمة شعيب صالح المدكوري

نَظْم لْحَرفْ

...

حْرُوفْ كْلَامِي اَ لَعْزِيزْ

مَنْسْوجَة بِ صَوفْ بْلَادِي

مْرَتْبَة ؤُ مْزَوْقَة

بْفَنِّي ؤُ تَقْلِيدْ سْيَادِي

اُ نَاسْ كْثَارْ فَهْمُوهَا

ؤُ عَشْقُوهَا

ؤُ انْتَ وَحْدَكْ عَفْتِهَا

گُلْتِي فِيهَا مَ شِي هَادِي

قْصِيدَةْ بَحْر زَجَّالْ

نَاقْصَة فَنْ لَمْقَالْ

خَارْجَة عْلْ طْرِيقْ لْعَادِي

...

حْرُوفْ كْلَامِي اَ لَعْزِيزْ

مْنَجَّة ؤُ مَكْبُوبَة

بِ اِدِّينْ مَحْكُومَة

تَقْرَهَا ؤُ تْعِيدْ

وَ سطْ خْيُوطْهَا

تَلْگا مْعَانِي

اَسْرَارْ زْمَانِي

تَنْصَحْ مَ تْعَادِي

اَصَالَة بْلَادِي

مِنْ زْمَانْ مْجَادِي

تَبْنِي ؤُ تْزِيدْ

...

حْرُوفْ كْلَامِي اَ لَعْزِيزْ

مَ تَشْبَهْ حْرُوفْ مْقَامَك

مَ هِيَ طَرْز حْكَامَكْ

وَ لَا صِيغَة بْلَادَكْ

وَ لَا تَشْبَه زْوَاقَكْ

وْ لَا هِيَ تَقْلِيدْ

حْرُوفْ كْلَامِي اَ لَعْزِيزْ

قْرَهَا بِ عْيُونْ خَالَقْهَا

بِ سُرْعَة تَفْهَمْهَا

رَاكْ تَعْشَقْهَا

ؤُ مَ تْعَيِّبْهَا

...

حْرُوفْ كْلَامِي اَ لَعْزِيزْ

بْغِيتْ غِيرْ نْبَيِنْهَا

مَ نْوِيتْ  نَطْعَنْ

و لا عْلِيكْ نْدَنْدَنْ

بِ قْوَالِي مَ نَتْلَوَّنْ

رَاكْ عْزِيزْ كْلَامَكْ مَسْمُوعْ

گَلْبَكْ بِ لْحُبْ مَصْنُوعْ

لِ كَرْهَكْ مَخْلُوعْ

ؤُ حْنَا بْجُوحْ خَوَة

مْحَبَّة صَافْيَة حْلُوَّة

ؤُ هَدَا بِيتْ لْقَصِيدْ

...

شعيب صالح المدكوري

الرباط 19.09.2017