رْفَگَةْ لَغْدَرْ

شعيب صالح المدكورى

******

رْفَگَةْ لَغْدَرْ
...
لِدَامْ بْلَا شَحْمَة
وْجَعْ لْگَلبْ ؤُ رَّاسْ
ؤُ لَعْظَمْ بْلَا لَحْمَة
تْهَاوَشْ دِيرْلْوَسْوَاسْ
أَاشْ هَادْ ضِيقْ ِؤُزَحْمَة
وَاشْ هَادْ لَغْدَرْ ؤُدْسَاسْ
زْفُوطْ ؤُ لْبْهُوتْ بِالْحَزْمَة
غَبْرُو تِيقَة طَارْ نْعَاسْ
لْمَعْقُولْ رْجَعْ غَمَّة
مَ بْقَا لِيهْ جْدَرْ وَلَا سَاسْ
ؤُ تْبَحْلِيسْ دَارُوهْ نَغْمَة
إِضَحْكُو بِهْ عْلَى نَّاسْ
نْهَارْنَا طْلَعْ ظَلْمَة
لَخْدَع ْبْلَا قْيَاسْ
لْمَعْقُولْ وَضَّرْ لْهَمَّة
مَ بْقَا عَنْدُو حَرَّاسْ
خَدْمُوهْ لْبَلَوَاتْ خَدْمَة
دَگُّوهْ بِمَهْرَازْ ضَرَاسْ
اِگَابْلُوكْ بْلَا حَشْمَة
ؤُسَمِّيوَكْ رَاكْ لْمَاسْ
نَيَّتْهُمْ غِيرْ شَتْمَة
طَاحَتْ إدْهُمْ فِ طَّاسْ
بَسْمَتْهُمْ لِيكْ لَكْمَة
تْلَاحْ اَصَاحْ ؤُتْسَاسْ
...
شعيب صالح المدكوري
17.09.2018
(المغرب)